TVB热播新剧《神耆小子》㖊晚播出第6集揭开唔少谜团，原来当年揾人打跛赵子勇（萧正楠饰）嘅幕后黑手并非钱大海（郑则士 Kent 哥饰），而系钱有方（傅嘉莉饰）前夫。赵一鸣（冼靖峰饰）同多多（罗毓仪饰）分别被揭出唔系子勇同继来（曹永廉饰）嘅亲生仔女，前者系子勇离世哥哥嘅仔、后者系继来前妻出轨司机后所生，而焦点场口就落喺聂镇江（鲁振顺饰）使计陷害继来同大海嘅剧情上。
同继来反面嘅聂总，为咗将自己利益，竟然以50万港元企图勾结阿Jack（吴子冲饰）影低同大海红颜知己洪玫瑰（樊亦敏 Amy 饰）嘅床照，该幕两大亮点分别系鲁振顺表情多多嘅搞笑演出，以及Amy 超性感「床照」。为咗营造气势，聂总相约Jack去阳光普照嘅天台讲数，身穿白T嘅Jack唔单止热到成头汗，双眼仲被晒到睁唔开；相反聂总全程气定神闲，着住Mark哥褛嘅佢仲振振有词话，成场戏感觉似系向经典电影《无间道》致敬。
鲁振顺透露呢场戏曾因天雨问题延迟拍摄，正式拍摄当日高温难挡：「系好热呀，现场工作人员好好，畀咗啲藿香正气片我食。Amy又好好，借咗把遮畀我遮太阳。」鲁振顺饰演嘅聂总市侩奸险，EQ相当低，经常大发雷霆，据知就连 Kent哥亦坦言角色好难拿捏，并大赞鲁振顺嘅趣怪演出大大提升咗角色嘅入屋度。鲁振顺事后谦称全靠剧本写得好，并感恩可以同偶像Kent哥合作。
至于Amy剧中嘅「床照」，虽然只系合成照，但为咗逼真度，玫瑰有躺喺张床度，露出大半个膊头同手臂拍摄合成原材料。Amy受访时坦言已尽力去性感：「惊再露太多会引起恐慌。」佢仲笑言剧集嘅「露点担当」落喺Kent哥、Archie同子冲身上：「子冲同我迟啲会有床戏，佢会冇着衫、满头大汗咁揽住我，仲会爬出窗。呢套剧嘅男士，裸露程度系多过女士嘅。Kent哥第一集已经露咗两点，子冲成日露两点，Archie都有露点。」另一搞笑位系Amy为咗掩护私会中嘅阿Jack，谂到喺大海面前无厘头大跳《叉烧包》，Amy超投入嘅忘我演出，赢得不少正评。
