由梁思浩、黄紫恩（Jojo）同黄耀英主持嘅《直播灵接触》，13 日晚播出嘅ㄧ集讨论话题为「凶宅」，嘉宾请到风水师周汉明以及曾从事地产经纪嘅塔罗占卜师罗泳娴（裸泳）。
节目中讲到凶宅都有程度上嘅唔同，裸泳话业界会将之分为三类，分别系自然死亡、自杀事故以及谋杀，楼价折让由一成至三成以上不等，佢话︰「除咗凶宅有啲屋都会有灵体喺里面，你会 feel 到、有迹象，入到去会唔舒服。试过有同事上凶宅偷懒，入到屋啲门自己闩，就知出事即刻走。」裸泳透露凶宅嘅不安指数，会连带令同层甚至楼上楼下，银行都估唔到价，裸泳补充︰「不安指数系视乎凶宅所发生案件嘅轰动性，越凶残、血腥、每一年（传媒）都会提嘅，就会非常高。」
周师傅话想知道楼盘是否「宜居」，不妨睇楼时带备两大「法宝」︰一缸黑摩利鱼或者7岁以下小朋友同行。周师傅系真实版「凶宅清洁师」，处理过唔少凶宅，多年前轰动一时嘅「公仔头凶杀案」以及「烹夫案」都到过现场视察。周师傅形容「公仔头凶杀案」现场情况令人震惊犹如乱葬岗︰「𠮶时应记者要求同徒弟一齐去睇，入去无耐徒弟话见到有『人』行过好恐怖，跟住感觉好头痛、毛管戙好想走。」
周师傅直言去完该凶案现场，自己运气亦有一段时间变差。周师傅透露一般会为凶宅进行密宗净屋仪式，步骤系先喺家居正中位置以及亡位诵经念大悲咒，令冤魂放下自在解脱，之后焚香清屋同拜五角，随身仲有一件法宝降魔杵超渡亡灵 。
思浩就分享晒天针嘅方法，找一支自己用过嘅缝纫针，于每日上午11点至1点时段曝晒足 7 日，然后用红纸包住保存。思浩表示天针有镇宅辟邪作用，睇楼时可以将天针放入一碗清水中，假如有灵体存在，天针会浮面，相反则会沉到碗底。
《直播灵接触》逢周一晚 9 点半及周二晚 9 点 35 分 TVB Plus（82 台）直播