旧年11月公布婚讯嘅林德信（Alex），话咁快升呢做爸爸，仲专登拣咗喺母亲节宣布喜讯。新手爸爸Alex难掩喜悦呢日出席活动，有女万事足嘅Alex，讲起两个月大嘅囡囡就停唔到口，指囡囡钟意笑，每次出街都唔怕丑见人就笑。
Alex分享喺太太怀孕九个月，就喺屋企做新歌后期，到囡囡出世后，每次听到新歌好有反应；佢又话自己系冲奶换片能手，Alex指囡囡中文名叫林明系嚟自爷爷林子祥灵感，阿Lam有日瞓晏觉，喺梦中见到日同月，跟住就提议用「明」字。Alex话当时未知BB性别，但系「明」字可男女共用，Alex又话好体会到BB系家族中快乐来源。
同场出席嘅艺人仲有蔡思韵、隋棠同泰国男星Tor，蔡思韵同男友刘俊谦参演电影票房口碑双丰收，令男友人气急升，蔡思韵话恭喜刘生，因为而家好多刘太，希望大家唔好咁快「改嫁」。好耐冇喺香港活动现身嘅隋棠，近排忙于拍摄新戏，当中有唔少动作场口搞到成身血，所以每次返屋企前要将假血清洗干净，以免吓怕家中三位小朋友，因为试过有次吓到囡囡跑回房喊。
