凭TVB经典剧《天师执位》中饰演大粒癦而令观众印象深刻嘅资深演员廖骏雄，喺上月18号不敌病魔而离世，终年64岁。廖骏雄囝囝家爵同囡囡宝儿今日（14号）喺大围为亡父设灵，灵堂布置简洁，横匾写上「德范长存」，丧礼采用佛教仪式进行。廖骏雄生前喺娱乐圈人缘甚广，不少圈中人如周润发、杜琪峰夫妇、韦家辉、郑少秋、任达华、黄日华、苗侨伟夫妇、姜皓文、翁静晶、滕丽名及许秋怡等送上花圈致意。另外，杜琪峰、汤镇业、黄日华、方中信夫妇、刘江、谢宁、谭玉瑛萧正楠夫妇、鲁振顺同林韦辰到嚟致祭。
忆述亡父生前点滴，家爵尽现不舍之情，当初亦冇谂过爸爸咁快离开，所以冇问到生前遗愿。佢话同爸爸都系大男人，好少讲心底话，而爸爸畀佢嘅教导就系自食其力。家爵又讲到爸爸离开后曾经报梦，佢哽咽讲到梦到爸爸帮妈咪拉被，但因为担心妈咪会伤心，所以唔敢同佢讲。
跟廖骏雄同为第八期艺员训练班嘅汤镇业同鲁振顺，一齐到嚟送别故友，汤镇业话当初廖骏雄畀佢印象系豪爽，非常关心朋友同学。佢哋为咗方便返训练班，一齐夹钱喺广播道租单位住，友情系班中最好。鲁振顺话自己同廖骏雄性格虽然两极化，但遇到问题时对方会义不容辞帮忙，鲁振顺喊住话自己有段时间经历人生低潮，对方二话不说借咗间屋畀佢住。
