韩国女团(G)I-DLE成员 舒华 人气旺高企，早前仲分享喺台湾出席活动后，同陶晶莹、贾静雯、方志友、柯震东嘅大合照，令粉丝惊呼：「估唔到舒华人脉咁广。」 不过同时又有粉丝不满舒华竟然同负面新闻多多嘅柯震东相识，令陶晶莹都有开腔解释，其实只系聚会时巧遇柯震东，两班人先会合照留念。
而舒华近日喺社交平台分享一系列靓相兼为新歌做宣传，并撰文：「Hey ~i love you」，再附上红唇符号，除左一班粉丝留言狂赞舒华好靓女，更引嚟柯震东留言。虽然柯震东只系留低三个微笑emoji，但佢嘅出现又再度令舒华粉丝不满，留言砲轰：「离叶舒华远点，你自己干过什么，心里没数？」、「你知道叶舒华被你害得多惨吗」、「别来蹭了，放过我女」亦有人猜测，可能舒华同柯震东暗燃爱火。
虽然亦有理智粉丝认为只系朋友间互动，亦有人为柯震东护航反闹舒华粉丝，但作为身陷舆论漩涡嘅当事人，柯震东心情明显受到影响，更喺限时动态连出两篇po文，分别系以黑底白字写上：「真多xx」，同埋一张动漫角色图片，配字：「看好看的东西洗洗眼睛，净化心灵」。而佢喺舒华贴文嘅留言亦突然消失，似乎已经删除。