一代武打女星郑佩佩喺美国时间7月17号离世，享年78岁。喺19号朝早，家人透过经理人公司发公告证实噩耗，佩佩姐爱女原子鏸喺社交平台发文尽现不舍之情。
钱嘉乐同佩佩姐相识多年，返回电影城录节目时有忆述两人相处点滴，佢话收到消息系非常难过、惊讶同不舍，嘉乐话佢哋经已有两、三年冇见。当年自己有份参演电影《色戒》要感激佩佩姐，因为李安导演要面试识讲普通话嘅演员，但嘉乐真系讲唔到两页纸对白，最后求助佩佩姐，对方好好录晒两页纸对白，最后佢就跟佩佩姐语气同发音去同李安面试。
佩佩姐喺1963年毕业于南国宝验剧团加入邵氏电影公司，首部演出电影系《宝莲灯》，片中反串男角而被受瞩目。喺1966年佩佩姐主演著名武侠片导演胡金铨名作《大醉侠》，奠定侠女形象。佩佩姐喺事业高峰期选择嫁台湾商人原文通，婚后息影定居美国，并育有三女一子。佩佩姐喺1987年离婚后重返影坛，喺1993年凭电影《唐伯虎点秋香》饰演华夫人，跟周星驰经典对手戏令观众印象深刻。
2000年凭李安执导嘅《卧虎藏龙》，佩佩姐饰演碧眼狐狸再现武侠女星风范，凭角色获得《香港电影金像奖》最佳女配角，佩佩姐喺2018年更获《第24届华鼎奖》「终身成就奖」，当日原子鏸更陪同妈咪盛装赴会领奖。
除咗电影奖项，佩佩姐喺2015年获颁「英艺奖」，以表扬香港艺人喺内地发展有好成绩，佩佩姐领奖时指自己从演超过半世纪，自己代表香港人，无论去到世界边个角落，都系香港演员，保持香港演员嘅专业。近年佩佩姐好少喺幕前演出，最后一套电影作品系2020年嘅真人版《花木兰》中饰演媒婆。
佩佩姐同前夫育有四名仔女，两位女儿原丽淇同原子鏸先后喺幕前发展，而𡥧仔原和玉身兼制作人同健身教练。佩佩姐思想传统，曾经喺访问中讲过要为三代单传嘅原家生一个仔，最终经历八次怀孕四次流产，诞下三女一子。子女们对佩佩姐爱护有加，喺妈咪晚年时陪伴身边。心胸豁达嘅佩佩姐早已看透生死，曾经透露离世后成为大体老师，遗爱人间。