薛家燕、冼靖峰（Archie）、关枫馨（Fabienne）同阮浩棕为全新厨艺比拼节目《家常便饭争霸战》担任主持，仲有厨神三姐萧秀香做评审。家燕姐细细个入行，虽然歌精舞劲演戏好，不过到拍拖先知识得烹饪嘅重要性，见到另一半得悉自己唔识煮饭后神情失落，家燕姐都急急脚拜师学艺，足足跟「西饼皇后」李曾超群女士学习一年，恶补厨艺。
参赛者将会透过指定食材作赛，以及自选家常菜式应战，争夺冠军宝座。三姐就向大家分享贴士，拣𩠌最重要系谂清楚自己想食咩，有咗主题就会好开始得多。如果连想食咩都决定唔到就乱买材料。好大可能会配搭错误。
Archie、Fabienne、浩棕喺记招上即席示范烹饪虾仁炒蛋，点知两位型男手势完全败露，最后要三姐出手完可以完成菜式。搞到Fabienne都话：「俾两位猛男耽误咗。」本身五分钟可以完成嘅菜式不但用咗九分钟，两位男士连落盐都唔识，仲问系咪成兜落，Fabienne眼都突埋。
