新城电台庆祝33周年嘅台庆音乐会，遨请咗一众歌手齐集会展演出，好似 陈晓东 孙耀威 罗启豪 薛家燕 泳儿 张驰豪 钟柔美 詹天文 林智乐 曾比特 林家谦 陈健安 等等先后献唱。
东东同Eric都已出道三十年，呢日终于首度同框合唱《那谁》，唔单止观众好惊喜，佢哋两位都觉得好新鲜，Eric亦话非常开心同东东咁多年来，都继续从事自己热爱嘅工作，希望可以凭住呢团火，一齐唱到八十岁。
而一班新生代歌手Aska、Yumi、Windy呢晚都使出青春本钱又唱又跳，啱啱喺泰国拍完MV嘅Aska，就话呢次拍摄过程好开心，导演亦都比咗好多空间去发挥，所以佢都希望大家尽情期待。而同样都系啱啱喺泰国旅行返港嘅Felix，就话呢次旅行做足防晒措施，虽然同Aska同时喺当地，但可惜缘悭一面未能相聚。
至于之前一直未决定好升学路向嘅Yumi，亦终于有定案，佢话自己因为DSE成绩未如理想，所以最后选择咗去HKU SPACE修读商科，佢表示自己都有其他学校Offer，但系都无去接受，因为佢话想花多一两年时间，向自己心仪嘅路向进发。
至于Windy啱啱去完美国旅行，期间佢都有参观之前取录咗佢嘅伯克利音乐学院，Windy话之前有传佢呢个学位系有条件取录，但系呢日佢就澄请自己系获直接录取。佢话呢次踏足过呢间著名音乐学院后，自己真系好钟意，所以会考虑喺广州读完书后，再赴美国留学。
首次同VSing合作嘅罗启豪，呢晚亦都同佢哋合唱咗几首歌，Ramon都觉得好新鲜。至于好耐无喺香港露面嘅张可颐，呢晚上台就唔系大开金口，而系分享佢嘅人生观，Maggie话再次踏上舞台嘅感觉好正，问到佢之前突然辞演新剧《巨塔之后》，Maggie就话因为剧集延迟咗开拍，加上自己之后又要开戏，所以佢只好无奈辞演，佢表示稍后都会多啲留港拍戏。早上被周启生叫废青嘅林家谦，呢晚演出心情未受影响，家谦话佢会尊重前辈嘅意见，问到佢觉唔觉自己系废青?佢就话自己的确有一种耍废嘅性格。
