林保怡望《刑侦12》开电影版 点名赞3位TVB后辈引荐入影坛？

林保怡忙于拍摄剧集《刑侦12》，呢日现身一个颁奖礼获颁最耀眼男演员奖，见佢受访时戴上口罩，原来佢近日病倒，即将喺4号生日嘅林保怡都话要快啲病好，赶住出席唔同嘅生日饭局，近年热爱简约生活嘅林保怡透露生日唔会大排筵席，只会约几个朋友食吓饭，至于生日愿望就祝愿剧集《刑侦12》成功。

林保怡更点名大赞同剧嘅后辈傅嘉莉、张振朗同陈自瑶相当努力。被问会否引荐张振朗入影坛，林保怡之前同剧集总监制钟澍佳倾过《刑侦12》开拍电影版嘅计划，如果开拍成功，希望可以顺势完成振朗嘅心愿。

同场嘅谢安琪（Kay）获颁最耀眼女演员奖，Kay话希望挑战练大只嘅角色，突破斯文人妻框架。 讲起日前佢喺社交平台大爆老公张继聪话佢张素颜照同电影版嘅猪八戒撞样，Kay完全冇嬲。

伍允龙（Philip）同时亦系九月寿星，9月16号生日正日Philip要出席新戏嘅首映，讲起新戏Philip讲得意义非凡，因为难得电影以武师幕后英雄为题材，同样系武行出身嘅Philip可以参演份外觉得有使命感。

获颁全方位艺人奖嘅方力申近年跳出自己嘅舒适圈多线发展，继之前去咗巴黎采访奥运之后，呢排又要重投歌手身份继续内地嘅音乐会演出，因为工作繁忙，连日前内地奥运健儿访港嘅大汇演，小方都话好可惜参加唔到。

陶大宇呢日获邀担任颁奖嘉宾，讲到佢有份演出嘅江湖电影成绩高开都令加盟入系列嘅大宇放下心头大石，好开心朋友睇完佢嘅演出都一致正评。