吴浩康公开演唱认经济状况改善 张致恒再上网求助允转介工作

吴浩康 Kiri T 日前出席出席港铁45周年嘉年华，现场献唱多首歌曲炒热气氛，眼见唔少家长都带子女到场，Deep亦指想带爱子参与，不过因太太已安排其他活动作罢：「而家工作可以自己就时间，所以平日有时间都带小朋友去玩，反而星期六、日忙教会服务，10月仲会参加布道会。」

Deep又话平时开工都会同唔少香港人一样搭港铁，不过因为乘客忙返工未瞓醒而冇人要求合照。提到早前远赴澳洲街头表演，佢又表示算系为移居港人解「思乡情」：「其实我系去布道会同传教，同当地朋友倾开知道大家都思乡，所以即席街头表演比大家开心吓！有啲人话我『唔系冇钱咩？点解咁有钱飞去澳洲做Busking？』，其实系误会，机票系人哋买比我嘅，我都坦白讲，其实经济状况同工作状况都已经改善好多，多谢大家关心！艰难时期同大家分享，而家好啲都会同大家讲。」

佢又指近期社会经济差，唔少建筑工友都开工不足，而 张致恒 都系受影响嘅其中一人，而对方再度于网上开口求助，Deep就指两人未有提及呢个话题：「我同Steven都系男人，关系同友情一般都系对方有需要先开口，我就睇点配合。（会唔会介绍佢开工？）如果客人有兴趣，我都会介绍比佢。」 

同场的Kiri T就指希望完成演出好好参观嘉年华：「我想快啲做完嘢出去玩摊位，平时我去录音室都会坐港铁出入，但冇化妆就会撞到Fans，喺我最冇打扮嘅时候见面！」演唱会举行在即嘅佢又大叹无法加场，希望有机会喺更大场地演出：「我会邀请一齐做音乐的朋友做嘉宾，仲有啲我帮佢作过歌嘅歌手一齐玩，所以大家期待吓！」