港姐奥运举行联合庆功宴 Mayanne入选影艺奖争亚洲之冠

《2024香港小姐竞选》转个头已经完成半个月，呢日15位佳丽就放低当时嘅竞争心态，齐齐重聚好好庆功喇。呢日除咗 秦冀雯 因为要返工未有现身之外，14位港姐同决赛司仪 麦美恩 庄子璇 ，仲有陪住佢哋拍外景嘅 江美仪 邵初 等都有出席。

几位前辈见证住佢哋投入选美，到后来不断进步迈向决赛，都话大家好似脱胎换骨一样，仲希望佢哋尽量保持初心咁话。

其中Mayanne主持嘅《Mayanne小喇叭》早前入围2024亚洲影艺创意大奖嘅香港区最佳娱乐节目主持﹐12月就会竞争亚洲区之冠，呢日佢就指主持港姐决赛后受外界唔少肯定，加上呢次入围大奖，难怪令佢喜上加喜喇。

至于应届四位得奖佳丽，冠军 倪乐琳 亚军 梁嘉莹 季军 杨杆瑶 同友谊小姐 王汛文 ，呢日终于可以放松一下，要借机会向所有一直协助嘅工作人员同导师好好感谢，仲话一班女仔会再相约食饭。

而早前为观众直播巴黎奥运各项精彩赛事嘅团队，亦同时举行庆功，主持 朱凯婷 就话虽然微运完结已经一段时间，不过今次联合庆功就可以特别慰劳一众男同事咁话。而「万能钟」 钟志光 仲有巴黎现场直击追访运动员嘅 庄琬晴 何振然 同 郑衍峰 呢日就话攰都唔紧要咁话。

另外，一众港姐得奖佳丽，呢日出席最后一个领奖活动，仲系由港姐前辈 冯盈盈 同 陈凯琳 颁奖，两位师姐就非常怀缅当年参选领奖嘅感受呀。至于几位应届佳丽亦即将展开银色旅途，佢哋仲对未来发展有唔同理想，仲有好多抱负想要挑战，仲想齐齐著古装扮演四大美女呀。