刘兆铭罕有现身公开活动 周日93岁精神饱满与后辈合照

嚟梗星期日（13号）就系刘兆铭（Ming Sir）93岁生日，近年因身体出现毛病须以轮椅代步嘅Ming Sir，亦不乏其风趣幽默性格，笑言虽然周身病痛，好彩个脑无事，所以就局住用脑多啲。

正如Ming Sir所讲，平日多用脑嘅佢虽然年将93岁，仍然非常精灵。近年深居简出嘅佢日前罕有现身公开活动，着西装戴花花呔嘅Ming Sir精神饱满，敖嘉年仲把握机会同大前辈合照，见到坐喺轮椅嘅Ming Sir微笑和蔼可亲，另一张合照，Ming Sir拎住拐杖搭住焦媛膊头企喺签名板前影相。

Ming Sir喺演艺圈德高望重，深受后辈敬重，晚辈如刘青云、黄秋生同吴镇宇等不时会相约Ming Sir聚会，而高志森去年初时与焦媛探望Ming Sir时，就话三人倾足三个半钟，仲大赞Ming Sir思路清晰兼口齿伶俐。