ENERGY新加坡签票会破纪录 Toro因身体不适提早离场

台湾唱跳男团ENERGY自从再合体之后掀起一股旋风，而呢股旋风近日就吹去新加坡，佢哋相隔22年再到新加坡宣传，为11月嘅演唱会举行唯一一场签票会，9000个fans逼爆现场，打破场馆搞活动嘅最多人数纪录，现场人山人海，睇上去非常壮观，而ENERGY亦好识做，话新加坡可以算系ENERGY嘅第二个家，现场9000位歌迷非常开心。

不过呢日活动发生咗小插曲，成员Toro中途突然离场，歌迷发现台上少咗一个人，都好担心Toro发生咩事，事后唱片公司解释Toro因为身体不适，所以提早离场返酒店休息，叫歌迷唔使担心，虽然四缺一，不过ENERGY依然喺台上落力演出，除咗招牌舞步16蹲力度不减，坤达同牛奶仲喺台上搞烂gag，不过一到唱歌𠮶阵，佢哋又全情投入，卖力跳唱回馈歌迷嘅支持。