看我今天怎么说｜黄修平新作伦敦影展世界首映 游学修苦练手语入围逐金马影帝

由 黄修平 监制兼执导 游学修 钟雪莹 吴祉昊 领衔主演嘅电影《看我今天怎么说》，日前喺英国电影协会伦敦影展 举行世界首映，黄修平率领团队包括监制何康、监制廖婉虹、手语指导海鸟同胡历恩、编剧千春亲赴当地出席，又同当地观众交流，更分享背后选角故事，大赞入围金马竞逐影帝嘅游学修开拍前苦练手语。

讲述三位聋人青年成长故事嘅《看我今天怎么说》入围下月举行嘅第61届金马奖三大奖，包括游学修同钟雪莹分别提名影帝、影后，以及最佳音效。而呢次出征伦敦影展举辨世界首映现场全院满座，令团队非常振奋！

继2021年嘅《狂舞派3》后，相隔3年再度推出新作嘅黄修平，对电影获邀参与BFI伦敦影展同举行世界首映非常荣幸，佢话：「可以将香港故事带畀全世界，电影仲得到非常之受国际上认可，好高水准嘅BFI London Film Festival青睐，邀请我哋世界首映，系相当之荣幸。」

黄修平仲觉得能够同伦敦嘅香港朋友重聚，令首映别具意义。佢仲提到现场观众对电影中一啲微细嘅声音效果同无声场面，引起观众深刻共鸣相当感动。
黄修平亦分享两位主角游学修同吴祉昊，选角嘅背后故事：「一早我已经决定聋人角色一定要由聋人演出，最后经手语老师介绍揾到Marco(吴祉昊)，我觉得佢本身性格，形象，同埋佢对演戏嘅热诚，纵使系素人都好适合做Alan呢个角色。」

至于选择游学修饰演聋人子信，黄修平就话：「游学修作为健听人，要演出聋人角色其实系好大挑战，我对佢嘅才华非常有信心，加上佢嘅个人经历、性格都同子信角色好吻合。开拍前我哋非常之严谨同唔留情咁请老师训练游学修嘅手语。喺唔同情境下有唔同嘅手语表达，佢同聋人朋友，同屋企人之间嘅手语style都唔同，而佢好认真咁去做呢件事，最后出嚟嘅效果非常好，佢获得金马奖嘅最佳男主角提名，系对佢努力同才华嘅一个肯定，非常之恭喜佢。」

导演仲感谢影展特别安排手语翻译员，令聋人观众同团队可以畅快喺映后分享会交流：「大会嘅安排非常细致，手语翻译员、聋人观众嘅位置安排同灯光控制，都令手语演绎清楚可见，非常细心同尊重在场嘅每一位，令我印象深刻。」

电影中手语演绎成为伦敦影展令人深刻难忘嘅一幕，导演又特别赞扬两位手语指导海鸟同胡历恩，喺首映礼上嘅同步传译：「海鸟用香港手语即时解说观众问题，胡历恩则将手语内容翻译成英文，呢场手语传译展示电影嘅创作核心讯息，将银幕上嘅共融精神推广到更广泛嘅国际影展舞台，我认为意义重大。」