奶仔滑雪有天份考获教练资格 冇时停乜都玩车牌一大箩

方绍聪 早年主持嘅《野外步出》系列，摆明就系将自己冇时停坐唔定嘅个性自肥喺节目发挥，既可以同唔同靓女嘉宾合作，又可以满足自己周围通处跑嘅欲望。近日奶仔又再有新兴趣喇，去年开始学习滑雪嘅佢，短短时间之下考获人生首个教练资格，仲话大家以后可以叫佢Milk Sir呀。

其实奶仔年初已经贴出过自己滑雪嘅影片，见佢滑得非常平稳又放松，以为佢已经系老手，点知原来佢只系初接触呢项运动嘅初哥，全情投入嘅佢经过朋友鼓励下报考教练班，最近就不断到广州练习，虽然首次考试失败，但系佢过连日不断狂操之后，奶仔终于成功获得首个教练祺格喇。

除咗滑雪教练之外，奶仔仲先后考获巴士同中型货车驾驶执照，加加埋埋私家车、电单车、小巴、的士、巴士、货车牌都有晒咁滞。而去年同 吴业坤 伍富桥 组队参加毅行者嘅佢，似乎真系一刻都唔可以停落嚟，3月时又曾去到大马参加赛艇比赛，1月初又跑毕全马，唔知冇时停嘅佢，下次又打算揾咩再挑战自己呢？