米雪亲自率团狮城演出 筹备联络邀请艺人一脚踢

米雪 最近率领一班资深艺人同粤剧名伶，到新加坡参与演出一场《百花齐放锣敲响》，大受当地观众欢迎，反应热烈座无虚席。今次演出系米雪同新加坡多媒体制作人王家翔联合监制，而作为策划人同组织者嘅佢，仲亲自邀请各位艺人参与咁话。

同圈中朋友关系一直非常深厚嘅佢，又话非常感恩老友一呼百应，呢次 尹光 吕珊 冯素波 蔡国庆 加上粤剧名伶 王志良 林颖施 郑咏梅 等，于星洲演出多出粤剧折子戏，佢自己亦大开金口娱宾。

虽然今次只系演出一场，不过就喺当地掀起抢飞潮，米雪就指新加坡观众非常喜欢香港艺人，对粤剧呢门传统艺术更有非常深嘅情意结，亦好关心粤剧发展同传承。因疫情影响今次演出足足迟咗几年先开锣，如今大家共同努力之下终于圆满完成，令佢非常开心。佢仲透露之前曾喺槟城同夏雨见面，亦曾力邀对方参与，不过对方就以时间太紧迫为由婉拒，但承诺往后有机会定必参加。

笑言已非首次担任策划人嘅米雪，笑言早已习惯身兼多职以唔同形式演出，活用自己行内多年人际脉络同演出经验筹备各种活动，自己亦非常享受其中。佢仲话稍后将会参演两出新剧，有时间仍会继续组织艺人到各地为大家演出呀。