「食屎陈师奶」为广告罕有露腿 孙慧莲受旧患困扰上落楼梯都痛

唔少人都知刘銮雄系处境剧《爱‧回家之开心速递》铁粉，佢喺访问中仲随口可以嗌出剧中嘅角色「食屎陈师奶」，可见剧集同角色都相当深入民心。

不过饰演「食屎陈师奶」嘅孙慧莲最近就受右脚膝头旧患困扰，以前曾任教师嘅佢，由于工作太忙所以无点理会旧患，点知年纪渐长，旧患就不时会疼痛，有时喺剧中要上落楼梯借豉油，都会令佢招架不住，孙慧莲表示：「旧患成日都扯住痛，上落楼梯都会卡卡声，平时拍戏上楼梯嘅戏份，NG多几次都会痛，真系有心无力。而且当年教书时候成日都企，搞到我长期腰酸背痛，已经困扰咗十几年。」

早前孙慧莲就受医疗中心邀请拍摄一辑广告，原来孙慧莲系该医疗中心嘅用家，佢经脊医及物理治疗师诊症后，做咗三次疗程就已经纾缓到困扰多年嘅腰痛同旧患，所以今次对方邀请拍摄广告，孙慧莲亦爽快答应。

广告中孙慧莲大方公开自己接受治疗嘅片段，当中更激罕露背又露腿。对于今次拍摄，孙慧莲表示系寓工作于娱乐，边享受疗程边拍广告，最重要嘅系佢喺疗程后条腰可以慢慢向下弯，而手脚同关节都变得更灵活：「拍起剧上嚟都容易得多，《爱回家》拍几多集都冇问题啦！讲真，我呢个年纪，最紧要就系行得、走得、食得，而家真系轻松晒！」