胡枫罗兰分享老友记饮食需要 「绯闻」老友为长者试软餐

活泼精灵嘅 胡枫 同 罗兰 呢Pair绯闻老友记，获邀为快餐集团推出嘅轻咽料理同推广大家开饭食物援助计划，分享长者对食物嘅要求，以及老友记对饮食嘅需要。

5月喺澳门完成演唱会，已届92岁嘅修哥依然活力十足，呢日佢再分享自己嘅保健心得：「除咗成日运动，饮食都好紧要，食得均衡先可以吸收到足够营养。有啲老友记其实好为食，不过人大咗，始终喺咀嚼同吞咽都会有啲问题，搞到食唔到嘢，就愈来愈瘦。今次就啱哂一班咀嚼同吞咽有困难嘅朋友。我同罗兰都试过佢哋嘅豉油鸡脾同京都骨，味道同埋外形都同原本差唔多，同我一样又有形又有味道。」

另一位活力老友记，90岁嘅罗兰亦指除味道之外，非常欣赏呢个计划照顾到老友记嘅社交需求。罗兰姐话：「我一直有返工就知道，见吓人、同人交流对我哋老友记保持心境开朗同埋头脑清晰系好紧要。我做义工时曾经有老友记同我讲，因为要食软餐，少咗好多同朋友家人一齐出街食饭嘅机会。而家老友记就可以同朋友屋企人坐埋一齐食饭，倾吓偈，谂得非常周全。」