谭咏麟因病延期惠州演唱会 拍片狂咳致歉亲交代病情

74岁谭咏麟（阿伦）近年忙不停，一时与温拿好兄弟开骚，一时又率领明星足球队喺内地打友谊赛，佢原定周六11月23号喺惠州举行《谭咏麟经典传奇巡回演唱会》，当日突然拍片交代病情，阿伦宣布因病取消，预计延迟至明年4月19号再同歌迷见面。

阿伦喺社交平台贴出一条影片交代身体状况，见佢面容憔悴，讲嘢其间更数度咳嗽，指佢同主办方啱啱开完会，阿伦喺前一日都尽力去试唱，不过佢把声出嚟嘅感觉系非常唔得，「我谂住有六成、七成我都会上台，但都去唔到」，最后阿伦与团队决定应该暂时取消演唱会，希望歌迷见谅，而拍片嘅过程中，谭咏麟多次咳嗽，睇嚟病得严重，要啲时间休养。

阿伦又指返港第一日感觉还好，星期一晚上开始咳嗽及失声，佢已马上睇医生食药打针，直至开骚前已用尽任何方法，任何对喉咙有帮助嘅药物都试用，亦冇帮助更冇好转，阿伦坦言喺台上彩排试咗个几钟，但冇一首歌可以完成；阿伦无奈决定将演唱会改期，希望之后用最好嘅声音、状态再喺台上同大家开心见面。阿伦叫歌迷唔使担心，自己会努力调理好身体。

主办方亦发布延期公告及补偿方式，指本次演唱会取消，将延期至2025年4月，观众选择保留订单或退票，之不过有部分内地观众对于安排感到不满，晚上开骚却喺下午先发出通知，有啲观众已前往当地，指今次只可退票，连交通费同住宿都蚀埋，另有网民体谅阿伦嘅失落与无奈，称阿伦以真挚态度道歉，希望大家理解。