郑丹瑞谢票遇母校老师变「喊包旦」 网上节目一人分饰两角道出废老心声

郑丹瑞(旦哥)同 卢慧敏（Amy)最近马不停蹄为主演嘅电影《得宠先生》谢票，日前旦哥现身母校「圣保罗书院」嘅校友场次，因为会见到当年教过佢嘅老师，所以令身经百战嘅旦哥喺戏院外面经已好紧张，入场时佢虽然故作淡定，向老师鞠躬讲「早晨」，老师亦回应佢「乖啦」，令全场爆笑。

然后旦哥开始口震震话：「我见到我中学嘅老师，我头先，依家已经想喊。」话口未完旦哥就爆喊，仲不停捽额头控制情绪，继而激动对老师讲：「你点会嚟睇我做戏㗎，老师？你要我读书乖，我都唔乖！」观众席上嘅老师话有追睇旦哥网上频道嘅节目令佢更加感动。

旦哥续说：「当年老师对我嘅关顾、对我嘅教育，今日希望老师睇到你嘅学生，做一出好戏俾你睇！多谢！」旦哥再向老师鞠躬致谢。 旦哥喺自己网上嘅节目度亦一人分饰两角宣传新片，健康旦访问戏中嘅废老「佳叔」，火药味浓「佳叔」更掟咪拂袖而去！ 戏中旦哥演超臭脾气嘅孤独废老「任春佳」(佳叔)，「佳叔」喺节目表达心声，透露「被退休」后变孤独老人、被女儿误会、与狗舍和浪浪「烧腩」嘅恩怨等。