黄智雯回味旺角「扫街」青葱岁月 化身伴游弥补粉丝遗憾

黄智雯（Mandy）最近推出网上半真人Show节目，继早前播出「前传」为Fans Leader庆祝生日实践对方梦想后，日前终于播出第一集主题系「遗憾故事」，黄智雯为弥补来自马来西亚粉丝嘅 阿恩一个「遗憾」，专诚带对方落区「扫街」、影贴纸相、夹公仔，引来唔少街坊围观，亦勾起黄智雯青葱岁月回忆。

一位来自马来西亚嘅粉丝「阿恩」，喺一个快乐嘅大家庭成长，与姨姨关系特别亲密，阿恩有个心愿就系自掏腰包带姨姨出埠旅行吃喝玩乐，一直以嚟阿恩好努力储钱，可惜年初佢却突然收到姨姨患癌嘅消息，阿恩从冇谂过一直储蓄嘅旅费，如今竟然变成姨姨医药费，最婉惜系几个月后再见姨姨，已经系最后一次见面，之后姨姨便离开。

阿恩遗憾未能带姨姨旅行吃喝玩乐，黄智雯化身成阿恩「姨姨」，邀请对方来港旅行，带阿恩游览香港，并落区体验本地小食文化、街头夹公仔、影贴纸相等，黄智雯表示：「今集最令我动容系，原本阿恩将内心嘅悲伤情绪一直压抑，直到拍摄尾段，佢终于打开心深处嘅情绪盒子，同我分享咗好多佢跟姨姨嘅生活点滴。虽然短短嘅行程，我未必能够为佢弥补啲乜，但我希望能为佢嘅心灵带来一点安慰同力量。」

黄智雯难得落区「扫街」，勾起其中学时跟同学放学后无忧无虑喺街笃鱼蛋、食烧卖、影贴纸相嘅画面：「已经好多年未试过『扫街』，有种好亲切嘅感觉，就系中学时嘅回忆，𠮶时同几个同学放学著校服一齐行街，去旺角中心、花园街笃鱼蛋、食烧卖。」