李小龙堂姊夫资深演员俞明 睡梦中安详离世享年100岁

人称「俞明叔」嘅资深艺人俞明，2月4号年初七人日喺医院于睡梦中安详离世，享年100岁。俞明叔喺年初二因病入院，后被诊断为肺炎，留院期间佢处于昏睡状态，直至4号家人收到医院通知俞明叔情况转差，家属抵达医院时，俞明叔已喺睡梦中安详离世。其女儿Heidi喺社交平台公布父亲离世消息，亦感恩父亲冇痛冇挣扎离开。

原名阮耀麟嘅俞明叔活跃于黑白粤语片年代，初时演活反派角色，随后转变戏路演谐趣角色，多年嚟参演超过300出电影同超过50部电视剧，喺1970获《欢乐今宵》监制蔡和平邀请加入节目，继续发挥趣剧技能，佢仲接受过廖启智访问畅谈唔同年代趣剧嘅分别、分享《欢乐今宵》难忘事。

育有三女嘅俞明叔喺1998年正式退休，女儿亦不时喺网上分享爸爸近况，四代同堂嘅俞明叔儿孙满堂，享受家庭乐。去年女儿分享俞明叔百岁生日相，一家人乐也融融合照，俞明叔亦精神奕奕。

退休后深居简出嘅俞明叔，于2015年曾出席EYT联欢晚宴，当时佢谈笑风生形容自己身体状况。除咗演员身份之外，佢嘅另一个身份就系武打巨星李小龙堂姐夫，以往每当李小龙从美国返港，俞明叔同家人亲自接机。

跟俞明叔合作过嘅薛家燕不舍前辈离世，话俞明叔睇住佢大，形容俞明叔系喜剧能手，跟对方合作永远笑唔停，不论戏内戏外都氹得大家好开心。