为纪念罗文八十岁冥寿 官网播放舞台剧白蛇传

罗文 经已离开咗大家22年，而今年系罗记嘅80岁冥寿，为咗纪念佢全程投入演艺事业，喺舞台上发光发热嘅一生。 罗文官方网站 将播放佢喺1982年同汪明荃、米雪同卢海鹏喺利舞台公演嘅粤语舞台剧《白蛇传》。

罗文早喺80年代身为歌手时，就有一个舞台剧梦，佢为咗实现梦想，不惜倾尽全力投入所有资源，花足一年时间去筹备排练，期间推咗19部戏，全心打造香港第一出粤语音乐舞台剧《白蛇传》。

作品于1982年3月4号公演，21场演出全部爆满，为咗满足观众要求，罗文决定加场演出，并于当年4月8号再度公演。

为咗纪念罗文对梦想嘅热诚，官网决定于加场演出嘅43年后，8号起喺官网播放全剧嘅影片。早年罗家已将演出母带捐赠予 香港文化博物馆 ，今次就由罗文胞姊向馆方申请向公众播映作纪念，并获授权于罗文官网独家播放，日后亦有计划制作纪念DVD。