​​林峰Chok爆红馆为七场个唱揭序幕 陈慧琳周秀娜任嘉宾掀全场高潮

林峰一连七场红馆演唱会正式开锣，草蜢、吴君如、马德钟夫妇、古巨基、吴卓羲、何超莲、谢霆锋、容祖儿、成龙、杨千嬅夫妇、郭富城、张振朗、梁竞徽等一众圈中人都为佢送上花篮道贺。作为「城寨四子」成员嘅胡子彤，亦化身小粉丝为阿峰捧场。
 
阿峰相隔9年再开红馆骚，事必然做到最好！无论系舞台抑或身材、发型都令人耳目一新。以一头金发霸气现身嘅阿峰，一连唱出多首快歌，以劲歌热舞为演唱会拉开序幕，当中亦唔少得唱经典情歌，一首《爱在记忆中找你》令大家嘅回忆返晒嚟啊！阿峰另一套歌衫亦非常抢眼，黑闪背心造型突显出佢一对麒麟臂之外，佢背部镂空嘅设计，亦将佢背肌强劲嘅线条展露无遗，令佢Chok爆全场。
 
首场嘉宾就有潮妈陈慧琳，二人合唱卡通片主题曲《驯兽师之王》，阿峰仲表示要做Kelly七月红馆骚嘅嘉宾。而另一个惊喜嘉宾周秀娜就喺《Let’s Get Wet》时性感登场，同阿峰大跳火辣热舞，认真吸睛。