新加坡出生，长年于香港发展嘅才子 蔡澜 早前离世，享年83岁。亲属极之低调处理后事，于社交平台发文指「蔡澜先生2025年6月25日(六月初一)，在亲友陪同下，于香港养和医院安详离世。遵从先生意愿，为免叨扰亲朋，不设任何仪式，遗体已火化。」
蔡澜近年曾多次传出身体状况欠佳消息，4月底就曾传佢需于深切治疗部留医，唯之后佢发文指属误传。年届古稀嘅佢2023年曾跌伤，之后有指佢月花数十万雇用多人团队照顾自己生活所需。
蔡澜一生经历丰富，无论电影、美食、写作都有研究，又被认为同 黄沾 倪匡 金庸 系香江四大才子，可惜满腹墨水出口成篇嘅四人如今俱以作古。
蔡澜 祖籍广东潮州，家有一兄一姊一弟，长兄蔡丹曾任宣传及电影发行，姊姊蔡亮曾任南洋女中校长，而3月逝世嘅弟弟蔡萱，曾任新加坡高级电视监制。
佢涉足嘅领域多到数唔清，年轻时期嘅蔡澜因父亲喺戏院任职，当时已同电影结下不解之缘。当时蔡家寓所就喺戏院三楼，佢就好似中咗戏瘾咁，几乎日日都喺戏院睇唔同电影。
蔡澜除咗著有多本著作之外，亦爱作画，同样亦自年少时产生兴趣，佢曾指学校美术老师粉彩画靓到爆，所以自己一得闲就去学，无形中就打下绘画嘅基础。再加上佢非常钟意读书，文化底蕴深厚，年仅14岁就曾喺《南洋商报》发表咗第一篇影评。
16岁时蔡澜负笈日本，于日本大学电影科编导系学习。读书期间仍经常到戏院睇戏，开阔眼光外亦积累唔少知识。当时佢更半工读，负责安排电影到日本拍外景嘅工作。后来亦成为邵氏电影公司嘅驻日经理，专门购入日本电影到香港发行。
到1963年，22岁嘅蔡澜就定居香港，担任邵氏电影嘅制作经理。佢由杂务做起，先后学识制作、招聘摄影队，而佢首部负责嘅影片就系《飞天女郎》。
佢曾提及当时嘅趣事，指拍摄王羽主演嘅经典作《独臂刀》时冇雪景更临近过年，为咗令工作人员可以早啲收炉返屋企，佢突然灵机一动以面粉代替真雪，认真有办法。
后来蔡澜转往嘉禾发展，老板邹文怀给予极大自由度发挥。佢就率领成龙、洪金宝同编剧陈景生，拍摄《快餐车》、《福星高照》同《龙兄虎弟》等大作。后来拍摄《重案组》时，因应九龙城寨拆迁，蔡澜向政府申请于现场撼放数十部摄影机，以大量炸药边炸边拍。后来佢又安排同日本合拍一系列由日漫改编特效片，好似《孔雀王子》、《阿修罗》等。
之后何冠昌离世，蔡澜认为拍电影要建立个人风格之余同时要牺牲好多人，觉得自己最钟意嘅事反而成咗最唔钟意嘅，于是就离开电影圈。
蔡澜对美食一样极有研究，于喺外地拍戏时，食匀各国美食，唔单止叹知名贵价餐厅，仲会研究点解好食，平民美食佢一样钟爱，认为美味同价格并无关系。而佢踏入美食界亦系因为一次食饭经历。一次蔡父来港一家人食饭，点知饭菜质素既差价钱又贵，服务员态度更欠佳，令佢一怒之下诉诸文字，结果之后就吸引无数报刊约稿。
佢曾为咗揾到最好云吞面，走遍港澳粤；为咗食到最好味嘅越南牛河，远赴法美，最后于澳洲寻获称心满意美味。蔡澜早于SARS后，就极力主张香港应设置夜市生态，既吸引游客亦有助低收入家庭发展，可惜当局未有积极回应。
早于20世纪80年代，蔡澜就于倪匡介绍下认识金庸，金庸认为蔡澜性格潇洒，之后就安排佢喺《明报》撰写专栏，栏名「草草不工」。后来佢亦喺唔同报章杂志发表文章，内容包括日常琐事、人生百态，极受读者欢迎。佢讲过写作第一年稿费收入就有120万。
唔少专栏文章曾结集出版，数十年来数量超过200本，佢仲同李碧华、亦舒齐名，系香港某图书公司嘅三大「台柱」。