陈美龄Agnes、姚焯菲Chantel、谭辉智、布志伦Alan、黄博、刘洋、周吉佩、古淖文German、黄洛妍Janees、林智乐Felix、谢淑怡Zoie等，呢日为7月5号晚举行嘅《明爱暖万心》进行彩排，由音乐总监赵增熹带领下与管弦乐团一齐排练。
Agnes嘅妈妈于上月17号离世，享年100岁，日前佢喺社交平台发文悼念亡母，Agnes呢日虽然未有受访，但保持表现专业同后辈Chantel 及黄博夹歌，Agnes无论喺唱法同台风方面都畀咗唔少意见。Chantel首次同Agnes见面，大赞前辈超级友善，听到对方声音好温暖，感觉好sweet。
中声唱将谭辉智同做过中声3评审嘅布志纶将会首度合作，辉智参赛时已经唱过Alan嘅歌曲，所以佢哋喺夹歌时已经擦出好多火花，Alan仲将歌词「如果我是陈奕迅」，唱成「如果我是谭智辉」，话掉转个名顺口啲。
而黄博除咗同大前辈Agnes合作之外，亦会同刘洋合唱，两大魔王合唱令人期待，黄博话好多人都问佢同大炮(指刘洋)合唱惊唔惊？但黄博就表示两人比赛时已互相欣赏对方歌声，能合作特别兴奋。
TVB娱乐新闻台 嘅主播 谢淑怡 本身系位钢琴家，今次佢会重拾钢琴家身份，与周吉佩合作，两人都会弹琴，吉吉仲话啱啱先知Zoie琴技咁高超，Zoie笑称自己弹到鬼上身咁。古淖文亦会献唱一首难度好高嘅金曲《希望》。
