何超仪 力捧嘅「医生男神」Iman多才多艺，唔止会主演即将开拍嘅电影《拾荒法师2》，年底又会同超仪合演另一部爱情喜剧，更已连接多部荷李活电影。做戏行医之余，原来佢更系文采飞扬，即将举行嘅书展就会推出首部亲自撰写嘅诗集《Lost In Your Eyes》。
诗集收录Iman嘅多首诗歌，仲邀请曾为张国荣、梅艳芳等巨星掌镜嘅国际摄影大师Sam Wong(黄永熹)操刀，作品于香港、澳门同泰国三地取景。镜头下嘅Iman尽显波斯人气质。原来Iman自幼就有写诗习惯。17岁时于伊朗以优异成绩考入医学院，孤单嘅求学过程中，诗歌就成为寄托寂寥嘅伙伴。
其后佢喺战地担任志愿医生嘅经历，令佢嘅诗歌见证生命嘅脆弱与人生无常。后来佢移居加拿大后， 面对新冠疫情再次执笔，以诗歌抒写人生嘅无奈。而超仪同Iman嘅缘分亦始于诗歌，佢喺英文序言中提及，两年前丈夫陈子聪到美国接受手术，命悬一线，就喺最心力交瘁时，Iman呢位来自波斯嘅医生由加拿大飞到美国，不单止术后悉心照料子聪，更成为夫妇两人嘅 心灵导师，陪伴佢哋走出生命幽谷。
事隔两年，超仪未忘记Iman诗歌嘅力量，仲将《Lost In Your Eyes》视为公司嘅最新跨媒介企划，标志支持跨领域艺术家道路上嘅新步伐。超仪坦言希望诗集嘅治愈力量传递俾更多人。
