年度大型慈善骚《星光熠熠耀保良》，将会喺8月9号晚隆重举行，呢日其中3位大会司仪李浩林Derek Li、黎芷珊同陈庭欣Toby及有份演出嘅歌手现身记招透露精彩演出。
现场逼满支持罗启豪Ramon、谭辉智、张与辰、黄博、姚焯菲Chantel、张驰豪Aska、林智乐Filex同詹天文Windy等嘅粉丝，场面热闹。Ramon喺慈善骚中会首唱新歌，而呢首歌嘅歌名都未定，认真新鲜热辣，Ramon只透露歌曲同以往曲风截然不同，有强嘅节奏感，令身旁嘅辉智揣测佢会跳舞。
喺节目中仲有好多新鲜嘅Cross over，辉智会首度孖连诗雅Shiga合作，与辰就会同古淖文German以及Aska有唱跳舞台，与辰事先声明自己系最差一个，Aska就期待同大家擦出火花。
中声3嘅演唱会同黄洛妍Janees首个个人演唱会都进入最后彩排阶段，与辰预告会有Closplay送上，叫粉丝们可以尽情期待。Janees出席完保良宣传活动就会乖乖作最后准备。
Chantel会同Windy、钟柔美Yumi喺呢个星期六去广州开音乐会，忙于排练之余，Chantel都好勤力埋手制作新歌，佢仲首度挑战参与作曲，而Windy亦学习紧编曲，希望日后学以致用。
