罗家英喺5月尾透露自己第四度患癌，受访期间乐观嘅佢表明唔接受电疗同化疗。自访问出街后，家英哥首度现身香港公开场合，并大谈身体近况，家英哥指身体安好，由于需要注射针药治疗，导致身体变弱、糖尿增高、贫血及唔够气，所以不时需要睡眠补充体力，闲时又会做运动散步。
由于糖尿指数严重，家英哥喺医生建议下转为打糖尿针治疗，稍后会再睇泌尿科医生，有机会要打女性荷尔蒙针。问到阿姐系咪佢嘅私家看护？家英哥就即刻笑住放闪光弹：「佢被我看护。」数度抗癌成功嘅家英哥，透过饮食同运动抗癌，如今继续享受人生，不时跟太太汪明荃四出旅游，稍后工作不断可以话系不言休。
同场出席活动嘅仲有陈雅伦、张文慈、吕良伟夫妇及黄一山等，啱啱去完意大利度假嘅吕良伟，原来行程约埋好友甄子丹一家同游。久未喺香港露面嘅细龟，谈到周星驰早前喺深圳拍摄新戏《少林女足》时，居于广州嘅佢本想前往探班，但星爷托身边人传话表示有心。
陈雅伦早前接受直播节目《直播灵接触》访问，公开遇过嘅灵异故事，原来佢嘅经历仲有后续，最近到过殡仪馆送别家人后，又再遇上灵异事件。
