年前公开患有渐冻人症嘅资深绿叶 吴博君 月初离世，家人透过曾协助佢嘅有心人证实噩耗。呢位自TVB艺员训练班第8期毕业嘅称职绿叶；当年与汤镇业、廖启智份属同班同学，多年来曾参演多部剧集，虽然并非主角，不过就个个都充满特色。
好似吕颂贤版《笑傲江湖》中嘅「桃谷四仙」，够晒怪鸡又搞笑；黄日华版《天龙八部》中嘅风波恶，就够义气又豪爽；仲有《鹿鼎记》嘅杨溢之，同陈小春扮演嘅韦小宝做兄弟，最后被做成「人彘」，惨到观众都为佢喊。角色就算戏份唔多，都令观众有深刻印象。
1997年金融风暴后吴博君离开电视圈，为生活曾任职酒楼清洁、保安等工作，被认出时更会笑嘻嘻同观众倾计。可惜2018年吴博君患有渐冻人症，需以轮椅出入，亦因肌肉减少需进食软餐，本来负责照顾有小儿麻痺症太太嘅佢，得病后就由照顾者变为被照顾者，夫妻不离不弃互相支持。
圈中朋友刘德华、薛家燕、张家辉等于知悉事件后曾出手帮忙，演艺人协会亦安排义工协助。吴博君年前接受演艺人协会访问时曾指，就算患病后对做戏仍然带住热情。呢位绿叶演员曾经光彩，佢对表演嘅坚持同面对困境嘅勇气，令牧丹都相形失色。
