全新歌唱选秀节目《声秀》，上星期播出序章介绍咗25位学员同七位导师，接住就会进入赛程。首先上演嘅系七位导师争夺学员环节，每位有3个名额，冇被导师拣选嘅4位学员将被淘汰。节目分成上下半场播出，25位学员各献唱一首歌，导师要向心水学员揿灯抢人，只有一首歌机会打动导师，所以拣歌方面学员落足心机。
来自江苏嘅胡子贝（Matt）挑战女歌男唱，演唱容祖儿嘅《心之科学》，广东话歌虽然令Matt感受挑战，不过佢认为系令自己进步嘅一种方式。冼奕瑜（Jasmine）就拣咗自己嘅强项，唱跳郑欣宜嘅《@princejoyce》；柯雨霏（Ophelia）就演唱周柏豪《我的宣言》、邓伟谦（Theodre）演唱Dear Jane《2084》。
林洁心（Bibi）喺拣歌方面就更加大胆，挑战「打大佬」，拣咗泳儿嘅《沟渠畅泳》，而原唱就喺佢面前。Bibi就话认识呢首歌嘅时候正系公公离世，种种原因令佢唱得好感触，亦认为自己喺第一回合要拎出所有本事，令导师选择自己。
学员林锦兴（小林）喺赛前因被发现同吴浩康撞样，加上二人工作都系喺地盘，所以大家都好关心佢会唔会成为阿Deep嘅学员。阿Deep都好关心林锦兴，仲向制作组了解过添！
