罗家英 继多年前战胜肝癌后，今年公开承认年来曾多次罹患癌症，目前亦第4度患癌，仲向外声称拒绝治疗，虽然太太 汪明荃 已多次向外界解释，不过近日家英哥接受资深传媒人 查小欣 嘅网上频道「红查馆」访问时，就再解释所谓「拒绝治疗」嘅意恩，仲指多次治癌已几乎花光积蓄，目前以注射女性贺尔蒙治疗导致非常疲累，加上早已切除前列腺，令性欲完全消失。
早前家英哥承认再度患癌，但表明唔接受化疗同电疗，因而传出「放弃治疗」嘅表态，而家英受访时就详细澄清：「我并唔系唔医，而系用另一种治疗方法；我之前切咗前列腺，检验报告冇事，但有啲嘢（坏细胞）潜伏喺深处，而家成型有好多粒切唔到，医生话只得一个方法，就系打女性荷尔蒙针，遏止佢继续发展，但大概8年之后就就需要化疗、电疗。我今年79岁，到时已80几，所以我决定到时都唔会再化疗、电疗，除非呢段期间发明新科技，有药物可以控制病情，否则不如尽情玩乐、饮饮食食！」
家英哥坦言自注射女性贺尔蒙针后，感觉身体较虚弱又容易疲累，又指早年切除前列腺后清心寡欲：「对于『色』字，个人定咗、淡咗！（性欲淡咗？）系冇呀。仲要打埋女性荷尔蒙，更加冇！惯咗，已经四、五年！」
佢直言2004年首次发现患肝癌时心情沉重、非常害怕，要靠念心经平复心情；到10年后再验出肝脏有事，就镇定得多：「最重要系有冇钱？我冇买保险，亦从来唔信保险，我以前就知道，我一定要有积蓄！第一次（做手术）用咗，第二次又再用啲……（积蓄因治癌使晒？）仲未使晒，仲有啲。仲有一件事，我冇叫老婆（汪明荃）帮我！（如果阿姐话要帮呢？）佢又冇话要帮，佢知道我有（积蓄），如果佢愿意帮我，我都好乐意！」
到第三次抽血验出前列腺癌，家英哥就更加淡定：「抽咗8粒瘜肉，其中4粒有癌，我去台湾拍完旅游节目返嚟先做手术，医生话前列腺癌进展好慢，可以两年后先接受治疗。」今次四度患癌，家英哥已完全学识与其共处：「我同癌症讲：『你喺我身体生存，我走咗你都要走！你咪以为你好威，大家相安无事，你唔搞我、我唔搞你，唔好喺度放炸弹！』」