罗家英与阿姐汪明荃80年代相恋，结婚20年来膝下犹虚，家英哥早前自揭第四度患癌，采取不化疗、不电疗，只用药物控制嘅治疗，家英哥近日接受查小欣《红查馆》访问，罕有谈及遗产分配及合葬等心愿，家英哥透露多年前已买地土葬，亦预留物业及购买两份保险畀老婆。
一向系圈中爱妻号嘅家英哥，四度患癌早已看破生死，近日接受访问时透露已预早规划后事安排，先系买咗两份投资保险写阿姐个名，最近又买咗一个物业畀阿姐，家英哥笑指阿姐得知后却毫无表示；面对生死嘅问题，家英哥祝愿自己长命百二岁，但佢言谈间亦流露出对阿姐满满嘅爱：「估计我会走先过佢，佢身体唔错㗎！…但我想迟过佢走，可以照顾佢。」
家英哥搬去阿姐屋企住，佢自言系「入赘」，不过佢同阿姐日常生活系AA制，二人喺钱银方面沟通得好清楚，家英哥每月有缴付五位数家用，过数畀阿姐助手。家英哥更自爆喺广播道有一间后备屋，若果两公婆嘈交，佢就走去避难，不过家英哥话二人好少嗌交。
家英哥透露十几年前已购入两幅墓地，希望将来同阿姐土葬。家英哥话嚟紧八、九年就想四围去行吓食吓住吓，被问有冇遗憾，家英哥坦言冇遗憾，做到就做，做唔到就算数。讲到膝下无儿女，家英哥认有少少遗憾，不过感觉有好有唔好，「因为冇仔女，你就冇后顾之忧，唔会谂将来个仔点，最多就系谂我一生功力做大戏，冇一个后人承继」。
