《中年好声音4》进行第一轮海选，参赛者卧虎藏龙，今届多咗唔少实力好强嘅过江龙报名，好似嚟自重庆嘅参赛者Aihan Yang、来自台湾嘅张振文，仲有由德国同日本特登飞到香港参赛嘅袁杰文同埋森腰充宏，佢哋位位都咁唱得，唔讲系海选，仲以为睇紧决赛。
而香港本地姜嘅实力一样唔嘢小，更有人以腹语应战，以特别嘅方式演绎《狮子山下》令评审大开眼界。而系云云嘅参赛者当中，唔少更系比赛经验非常丰富，好似24年前曾经参加过新秀及09年参加过《超级巨声》嘅何晶晶，呢日再踏《中声》舞台接受海选，佢都话心情紧张过生仔呀，仲话《中声3》嘅黄博同埋陈芷盈嘅歌声令佢好感动，佢希望日后都有机会同两位合作。
参赛者当中，有小学校长为咗参赛而辞职、有《中声3》100强不入嘅参赛者卷土重来、有视障嘅钢琴调音师、仲有遗体化妆师，当中仲见到本身已经系歌手嘅陈逸璇，真系各行各业都无阻佢哋对音乐嘅热诚。
肥妈、张佳添同海儿睇完第一日嘅海选，不约而同话对《中声4》好有信心，添Sir话好开心见到参赛者一届比一届好，又劲、又有惊喜仲好有特色添，而肥妈都大赞今届水准相当高，所以自己比分都手紧咗。《中年好声音》迈入第四季，参赛者实力越来越强，报名人数有增无减，今次参赛人数更超越5800人，曾志伟都话好期待可以帮更多有梦想嘅中年人圆梦。
