第60届台湾金钟奖将于10月17、18号举行，Lulu黄路梓茵将会主持第一日嘅「节目类」颁奖典礼，而第二日嘅「戏剧类」就会交棒畀曾宝仪。
二人主持经验丰富，掌控节目流程驾轻就熟，面对每年颁奖礼遇上嘅「超时」大难题，Lulu同宝仪就搞笑话唔可以将超时嘅责任全部赖喺主持人身上，因为有好多时系得奖者发言欲罢不能，先会导致典礼严重超时，所以佢哋公开呼吁得奖者，得奖感言要尽量精简。
身兼歌手、主持同演员等多重身分嘅Lulu，被睇好有机会凭许光汉主演嘅剧集《正港分局》入围戏剧类最佳女配角，Lulu原本话自己完全冇谂过，不过得到大家嘅鼓励，突然之间信心大增，一旁嘅宝仪仲叫佢快啲准备战衣添！
