去年因 蔡一杰 接受脑部手术，令原定嘅草蜢「Re:GRASSHOPPER演唱会」世界巡回演唱会暂停，不过随著杰仔非常理想嘅康复进度，巡唱亦将再次启动。三子亦同时积极筹备明年4月嘅40周年红馆演唱会同推出全新专辑。杰仔更宣布会配合新歌《老的辣》推出「老的辣捞面」，寓意大家捞到风山水起，身体健康。
蔡一智说：「今次演唱会真系同『Re 』呢个字好有缘份，喺杰仔Recover(康复)后，再Restart(重启)，我哋会将呢个演唱会带去新加坡、澳门、马来西亚、广州等地方，同大家一齐Reunion(重聚)。亦都会将好多草蜢经典歌曲Rearrange(重编)，希望带俾大家耳目一新嘅感觉！」
阿智又用「打边炉」形容演唱会重启：「同喺香港打边炉一样，你打过一次边炉，食第二次会有唔同感觉。」苏老板补充：「因为会有新菜式！」杰仔亦点头同意。阿智仲话：「今次呢锅边炉加咗辣，因为蔡一杰写咗首新歌《老的辣》，所谓『姜是老的辣』，有唔同食法。所以即使之前睇过都可以再睇，因为感觉会唔一样！」
康复后精神十足嘅杰仔仲笑言今次唔止有得睇仲有得食：「要对《杰少煮意》嘅观众讲声对唔住，差唔多近两年无上新片，首先系不断做巡回演唱会，后来又要做手术，所以今次推出『老的辣面』希望大家包涵！」杰仔仲透露系「捞面」，希望大家捞到风生水起！
完成四站巡唱后，紧接启动「草蜢40周年企划」，包括收录杰仔新作《老的辣》同阿智作品《Framily》嘅专辑，仲有2026年4月红馆演唱会以及新一轮世界巡回演唱会。阿智指：「上次喺陈慧琳演唱会宣布呢个消息之后，亲朋好友就开始揾我哋买飞。大家唔使再揾我，爆㗎喇，预计12月公布订票详情。」
下月初嘅中秋节，草蜢仲会参与喺广州举行嘅一连三日「超级草莓音乐节2025」，更预告其中一场演出将劲歌热舞近一个小时。阿智仲话到时要带月饼、茶等应节食品去做骚，草蜢合体齐过中秋，人月三团圆！