由 梁咏琪 李心洁 杨采妮 许茹芸 2007年共同创立嘅「小黄花慈善基金」，成立以来不遗余力协助弱势社群。Gigi梁咏琪每年暑假仲会为基层学童安排唔同活动，好似每年为学童播放电影嘅「小黄花影院」，近年先后因为疫情以及Gigi嘅世界巡回演唱会而无奈停办。不过今年暑假Gigi虽然忙住为电影《无名指》宣传，但仍腾出时间，再次以「小黄花慈善基金」创办人身份，同「香港基督教女青年会」合办「童心同行 光影同乐」电影分享会活动。
当日来自62个基层家庭；父母与子女超过二百人，一齐到戏院观赏动画电影。Gigi话：「虽然疫情期间，『小黄花』冇办法举行活动，但𠮶段时间我哋都有帮手筹集消毒用品、口罩、快速检测包。分别捐去唔同嘅机构，因为当年呢类用品供求好紧张，系好多基层家庭，好缺乏呢方面嘅资源，所以『小黄花』都希望可以出一分力，帮助有需要嘅人。」
对今年终于复办「小黄花影院」，Gigi心情亦格外兴奋：「一家人买飞入场睇戏，好似微不足道，但其实好多家庭都未必有呢个经济能力。能够喺暑假小朋友最开心嘅日子，有爸爸妈妈带住一齐去睇戏，系一件好开心嘅事。」 当日Gigi穿上「小黄花」会Tee，提早迎接呢班「特别嘉宾」，而为答谢Gigi同「小黄花慈善基金」赞助基层家庭成员入场睇戏，各个地区中心亦派出一位小朋友代表，向Gigi致送亲手造嘅纪念品答谢。
正投入新戏拍摄嘅Gigi，回想当日见到父母同小朋友一齐入场睇戏嘅欢乐画面，令佢更加希望明年暑假，继续筹办更多唔同类型的活动：「除咗『小黄花影院』，我哋仲赞助一班学习障碍嘅学童，帮佢哋揾老师学跳街舞，但我觉得未够。希望明年暑假，『小黄花』可以举办多啲活动，让更多有需要嘅小朋友受惠，等佢哋可以过一个有意义、充满欢乐回忆嘅暑假。」Gigi说。
