近日系内地国庆同中秋长假，各地都有举行大型活动吸客，亦邀请唔少香港艺人化身人肉NPC出巡见粉丝，其中视帝 黎耀祥 就应邀到广州长隆一个主题乐园，为内地嘅「玩圣节」 (即香港嘅万圣节)活动宣传。
祥哥未有化身哗鬼，反而Cosplay经典剧集《巾帼枭雄之义海豪情》中嘅刘醒，祥哥著晒戏服同粉丝合照，佢亦即场喺户外同扮演非凡哥嘅演员对戏，重演经典场面。 虽然只系娱乐性质，但系祥哥依然七情上面认真演绎，令围观嘅朋友都报以掌声。
祥哥嘅工作从朝做到晚，晚上佢再度出动参加园区嘅花车巡游，仲同入场嘅朋友逐一打招呼同击掌相当亲民。 
另外一个大型嘅节庆活动「火人狂欢节」，就请到多位港星到唔同嘅情景区参加巡游同粉丝见面，其中温兆伦、李国麟、黄一山等著上戏服重现自己嘅经典剧集或电影嘅角色，好似温兆伦扮《我本善良》嘅齐浩男、黄一山著住龙袍化身《九品芝麻官》嘅皇帝、李国麟就变身《天龙八部》中嘅鸠摩智，大热天时出巡同市民见面，众人都保持敬业嘅笑容，相信酬金应该唔错。
而79岁嘅 罗家英 亦喺杭州化身人肉NPC，著起黄袈裟再次化身《西游记》中嘅唐僧，家英哥早前自爆患上前烈腺癌，决定唔做化疗，改以注射女性荷尔蒙针同服药控制病情，正喺抗癌路上嘅家英哥继续工作，呢次嘅工作亦相当耗体力，杭州当日天气有摄氏25至36度，家英哥既要抵住炎热天气出巡同粉丝见面，亦要去舞台办小型粉丝见面会，同影迷互动，不过家英哥就未有表现半点疲态，表现非常专业。
