Coffee喺28号出Post大叫：「我吓到失眠呀痴线，而家个心情都仲未平静到。」佢指当晚自己为朋友庆祝完生日，11点45分由中环揸车返屋企，12am去到屋企嘅回旋处位置准备落停车场嘅时候，座驾突然无故自动急刹：「我仲chok到条颈，好彩冇Chok到个肚。」
但最令Coffee心惊嘅系：「我望住架车个Screen，显示有个人好近系我架车前面行紧，仲转身望一望我跟住又继续行走，但架车出面系空地同埋完全无人架。」而呢个情况原来已唔系第一次发生。Coffee表示上个月去完朋友屋企，载住囝囝返家时，喺同一个位置发生同一件事：「架车无啦啦急刹跟住个screen又显示有人系前面行过，但前面又系空地一个人都无…当时彦彦仲问我系咪有怪兽我仲安抚佢。」
其实Coffee呢款座驾品牌所出嘅车，自推出至今喺海内外都有唔少用户发生过类似嘅「灵异事件」，更有外国司机喺空无一人嘅坟场，车上屏幕显示感应到有人出现并停留喺车前。
有网民表示：「同一个地方发生2次真系难怪会觉得邪」，Coffee就话：「系呀，仲要条路我日日都会经过，两次发生都系呢个时间呢个地点」不过有网民以科学分析安慰Coffee，表示可能系「Sensor坏」，或者系「如果只系特定一个地点sensor 感应到嘢，就可能𠮶个地方有灯光/超声波/红外线发射令架车以为有物件令讯号反射。」令Coffee都话：「好啦，我舒服啲啦」。
