「中声歌手」罗启豪同歌迷会主办嘅亲子嘉年华「小鬼大作战」，大受家长与小朋友欢迎。嘉年华最后一日，启豪亲临会场献唱大会主题曲《小鬼主意》，亲自落场同大家玩游戏、落力推介唔同社企产品，为嘉年华画上圆满句号！
一众歌迷为活动出心出力，令启豪倍感自豪，亦好感动大家每次举办活动嘅目标系面向公众、积极行善。短短个半月时间，就筹划出呢个大型活动。设计师出身嘅启豪亦喺百忙中负责设计主题角色「功课鬼」、「牙刷鬼」、「青椒鬼」及「闹钟鬼」。
嘉年华圆满结束后，启豪立即全力投入第二次个人演唱会嘅筹备工作，佢表示：「歌单已差唔多落实，上次主要讲我嘅故事，回顾我喺《中年好声音》所唱过嘅歌，但今次会选唱大家意料之外嘅歌，包括唔同语言与曲风。」
演唱会如箭在弦，启豪喺月中就要飞到美国，伙拍蔡思贝、罗子溢、王郑浚仁登台。既应付美国演出，又要开始排练香港个唱，启豪忙到冇时停：「又未至于分裂，但确实唔可以完全放低香港演唱会，两个骚要同步进行，筹备美国演出之余，要开始先练香港演唱会歌词。」
