TVB长寿节目《欢乐今宵》虽然告别观众多年，但节目元老每年都会举办EYT联欢晚宴聚首，呢晚胡枫、罗兰姐、余慕莲、卢海鹏、邓英敏、林嘉华、詹秉熙、潘芳芳、卢敏仪、陈荣峻同太太吴香伦、冻龄女神张凤妮、仲有前金牌监制李添胜、潘嘉德等近二百人现身场面墟冚，众人更合唱《晚安歌》。
修哥登场时更大受老友欢迎，个个都争住同佢合照，修哥都话大家见到自己嘅时候一直笑口常开，令佢都好开心。呢个聚会亦系修哥每年最期待，见到老朋友们个个都好后生，至于自己年纪大，但心境同样年轻。
早喺80年代已经亮相EYT嘅李有毅，今次就带埋阿仔李国炜一齐嚟感受一下呢个大家庭。李有毅就话阿仔都系EYT之友，细细个已经喺EYT出现过。李国炜作为「中声」歌手，令爸爸都话讲到唱歌完全唔及阿仔，亦系阿仔同佢讲，先知有呢啲大型比赛。
黄泽锋嘅细女出生后，佢几乎与世隔绝闭关凑小朋友，呢晚见返咁多老友特别开心，更幸福分享全职做奶爸状况。泽锋就话囡囡食人奶，所以老婆两个钟要喂一次，自己都要抱囡。佢仲话，而家嘅小朋友都好聪明，虽然只得两个月，但听到自己行近就会喊大声啲扭计要爸爸抱。
