11月底嘅大型筹款节目《善心满东华》因为节目内容调整关系，一众艺人嘅精彩筹款项目将于今个星期六27号晚于节目《东华三院善道同行》中同观众见面，当中 袁伟豪Benjamin 同应届港姐 陈咏诗Stacey 嘅合力演出惊险项目。
两位先联同一大班同事跳上行驶中嘅车上，做出叠罗汉动作，而两人亦分别有个人表演项目，骑住越野电单车嘅阿Ben首先越过独木桥，再连人带车穿墙，最后仲嚟个特技飞车，倾力为项目筹款。
演出后阿Ben都感慨已经七年冇接触类似项目，过程中有好多心理关口，始终自己已经成为两孩之父，所以事前度桥时都有所顾虑，笑言当肾上线飙升时，就只谂到飞啦。在场见证住阿Ben飞车嘅一班同事都戥佢紧张同兴奋，完成人生一大创举，阿Ben都走埋向去感谢在场同事嘅鼓励，并坦言未试过飞咁高同咁远，个项目真系特技人嘅专业，演出时撞落纸皮箱到时更不慎冲撞到心口，幸好冇大碍。
Stacey就喺电单车上表演最拿手嘅体操，做出多个高难度动作，画面优美，而最后一幕Stacey更加需要好大嘅胆色，因为要喺两架车一边行驶之间做出一字马，极具难度挑战，佢都话事前同演出时都超紧张。
