袁伟豪 同 张宝儿 2020年结婚，并育有2位小朋友，婚姻生活非常美满。不过日就有网民重温一段旧片，就系阿Ben喺2018年同周励淇合作拍片时，对Niki讲过一句：「我银包得返廿蚊，点敢追你呀？」 阿Ben同Niki当年喺《再创世纪》一剧饰演情侣，但最终悲剧收场，所以Niki就邀请佢作客自己网上节目做嘉宾，二人「再续情缘」做一日情侣。
二人喺一个大牌档食饭时，气氛好好，仲提起Niki曾经一张箍牙相。阿Ben就向镜头问：「点解你唔问我，喺地铁见到佢箍牙个样仲追唔追佢？」Niki答：「我箍牙又唔系做咩坏事，箍牙几靓？」阿Ben就话：「我就系钟意你呢样嘢，箍牙有罪咩？」 之后Niki再问：「如果当年你会唔会追我呢？点解你唔追我嘅？系咪因为我唔够靓？」而阿Ben就淡然回应：「我银包得返廿蚊，点敢追你呀？」Niki就话：「可能真系得㗎。」
再又倾到阿Ben钟意嘅女仔类型时，Niki就话阿Ben而家系钟意Bowie𠮶一款，但阿Ben就话：「唔系啊，你我都钟意㗎。因为我知自己高攀唔起你先冇追你。」 呢段对话片被网民旧事重提分享后，随即成为热话，亦有人分析，阿Ben同Niki除咗《再创世纪》，仲拍过《桌球天王》、《好心作怪》、《流氓皇帝》呢三套剧，而阿Ben所讲嘅「得返廿蚊」时期，极有可能系《桌球天王》时期，当时Niki已经系人气火爆，阿Ben就系加入TVB冇耐，身份悬殊。
