1月18号系胡枫94歳生日，连日嚟佢都同不同好友庆祝，呢日修哥现身好友王玉环嘅庆祝晚宴时，收获大大祝福，仲好精灵咁同传媒开玩笑，自称系「47对」生日。
修哥日前获周润发、谭咏麟、刘德华等巨星齐齐唱生日歌贺寿，令见惯大场面嘅佢都吓咗一跳，坦言自己咁大个仔都未试过咁大场面，非常意外：「当日两位华仔(刘德华、黄日华)突然间落台秤起我上台唱生日歌，真系好意外。」发哥当日都有到场，讲到有冇叫修哥一齐跑步时？修哥又搞笑话冇，佢叫我同周公一齐跑。
修哥新一年落实会再次开骚，佢喺行内契仔众多，人人都好锡契爷，但修哥开骚就唔好意思打搞大家，唯独会叫张家辉嚟参与。之前修哥去咗睇其中一位契仔张学友嘅演唱会，仲获得学友独家福利，叫修哥点唱三首歌曲。
王玉环呢晚由老公陪同举行庆祝晚宴，贺佢喺保险业界有破纪录成绩，圈中一班好友罗霖、张文慈、文雪仪、谢宁、陈曼娜、郭秀云、杜德伟等都一齐嚟开party ，王玉环更分享由艺人转投业界嘅成功之道，多年来获得老公支持系最大鼓励。
杜德伟带同老婆一齐现身，Alex多年嚟唔单只自己keep得冻龄，就连夫妻相处之间都同样保鲜。
