香港演艺人协会初八喺会长古天乐、副会长钱嘉乐及一众理事会成员率领下举行2026年春茗茶聚，吸引逾百会员踊跃出席，包括罗兰、余慕莲、冯素波、丁羽、刘江、程可为、吴浣仪、梁葆贞、黄夏蕙、陈勉良及黄文标等现身支持，场面墟冚。
香港演艺人协会第十七届理事会换届大选已于去年底完成，古天乐连任会长，钱嘉乐、张继聪任副会长，古天乐自上任香港演艺人协会会长后，一直与众理事会成员致力维护演艺人权益，并积极进行各类慈善公益活动，当中包括School Tour、老人中心探访等。
会长古天乐今年一如往年喺春茗茶聚向全场会员派发利是，亦向全场会员派发由福幼基金会赞助嘅福袋；而余安安、张继聪、周家怡、张敬轩、岑乐怡亦有赞助现场礼品及抽奖礼物，令每位出席会员满载而归。
席间颁发「杰出演艺大奖」以表扬过去多年来为演艺界贡献良多嘅前辈艺人，今年由吴浣仪、程可为、刘江荣膺奖项，三人喺古天乐及钱嘉乐手中接过奖项，期间吴浣仪、刘江不约而同表示自己系首次出席演艺人协会活动，刘江话：「好多谢大家冇忘记我，自己唔习惯参加呢啲场合，性格比较内向，今日第一次出席。平时喺TVB成日见到大家，感觉系理所当然，但原来唔喺TVB嘅话要见面系好难，今日见番大家好开心，多谢大会颁呢个奖，我觉得自己未有资格。」
吴浣仪亦感谢古天乐会长及一众理事，大赞佢哋非常有心。 程可为领奖时，尽显幽默风格：「我最唔识讲嘢，竟然要我讲嘢！好开心呢个年纪、呢个记性仲可以出镜演绎角色，回顾一生到而家，我觉得而家系最开心，挨到而家75岁仲有工作，真系想唔到，有健康、有靓嘅心情。感激上天畀智慧我，同埋畀个样我啦，而家都仲睇得吓啦！多谢大家！」
罗兰姐呢日精神饱满到场，席间不少艺人上前跟佢合照及拜年，问到罗兰姐健康情况，罗兰姐大方话：「脚麻麻地，天气潮湿，脚会痛，新年都唔敢周围去，惊多人。而家冇拍嘢，会喺屋企念吓天主经、圣母经，朋友会打嚟倾吓偈，电视有节目教人做运动，我每日都会跟住节目做大半个钟运动。」
