萧正楠当年与太太黄翠如喺新西兰注册结婚，阿萧喺前日播出𠮶集TVB旅游节目《他们的澳洲驾期》，于车上分享自驾游经历，仲爆翠如一段乌龙事，搞到翠如扮嬲话「我下次封住你把嘴」。咁佢哋两公婆相处恩爱，同样好锡阿仔萧哈哈，阿萧除咗早前出埠买一大堆手信，今日更为宝贝仔庆祝一岁生日！
阿萧喺节目透露当年二人瞒住屋企人，揸车去Tauranga办理注册，完成手续后要等候7日先能够领取结婚证书，到咗领证当日，翠如见现场唔少身形健硕兼有纹身嘅女士，疑惑点解今日咁多人结婚，阿萧叫佢唔好理人，照去交表格，直至递交表格𠮶刻，翠如先惊觉自己排错队，𠮶条队系坐牢、交罚款或办理死亡证，原来隔篱间房先系领取结婚证书嘅地方，阿萧笑指跟翠如一齐有好多滑稽嘢，之不过呢啲都系难忘嘅点滴。
翠如今日喺社交平台分享影片，原来佢同阿萧为1岁宝贝仔哈哈庆祝生日，举行一个小型生日会，翠如开心写道：「萧哈哈，这一天，是你睡醒的第365个早上，您还在感冒中。爸妈不为意眨了眨眼，您一岁了。爸爸妈妈笨拙地做了一个最细小的生日会，纪录您，幸福的一刻。祝我们的小笑睑生日快乐🎈🌈。」
翠如解释除咗自己未被传染，全家病晒，所以低调喺家里庆祝，片中见阿萧两公婆努力布置，预备咗气球及彩虹蛋糕，哈哈见到蛋糕及色彩缤纷嘅气球，立即笑晒兴奋爬上前，随后一家三口唱生日歌兼吹蜡烛，而一班圈中好友陈自瑶、区永权、梁诺妍及连诗雅等纷纷向哈哈送上生日祝福。
