柯炜林 自去年确诊患肺腺癌第四期后，其身体状况一直备受外界关注，柯炜林呢日接受TVB娱乐新闻台《StarTalk》访问，剖析患病心路历程，由起初心情难以接受，到采用标靶治疗方案抑制，学习与疾病共存，坦言而家冇事，但佢唔知往后呢只药仲可唔可以咁样食落去。
柯炜林话呢一年好赤裸面对自己，突然好似回顾咗过去33年嘅一生，直到最近呢两个月先讲到自己心情出嚟，柯炜林曾跟妈妈讲过感觉似鬼门关走咗一转咁，始终要接受呢个病喺身体里面并唔系一件容易嘅事，柯炜林亦唔甘心被疾病打败。
记得去年出席《触电》宣传活动造势，柯炜林当时仍接受标靶治疗，感觉到啲药有效，身体素质好咗，柯炜林决定积极投入工作，当刻系未完全接受自己个病，坦言而家见到「癌」字都仲会感到害怕。
柯炜林觉得佢嘅呢个年纪要点样去面对同接受，个病留下嘅创伤好大，唔可能一开始就维持正能量去拥抱疾病，柯炜林笑指自己系屋企成员当中最软弱𠮶个，喺佢患病后，一家人用咗两星期便整合搬埋一齐住，仲笑言阿妈心态更胜自己，有时仲会讲「地狱笑话」。
柯炜林坦然去接受情绪偶尔有崩溃时刻，话冇可能发晦气掉咗啲药唔食，因为啲药好贵，只能够喺每次崩溃后要识得整理情绪，不断去拼凑破碎嘅自我，喺抗癌路上继续努力前行！
