修哥胡枫 呢日以一身闪爆闪石金西装现身红馆个唱记招，呢次更系修哥以95岁高龄再踏红馆。修哥喺记招上，更以皇帝上朝嘅姿态坐上龙椅，完全代表佢喺演艺圈嘅至尊地位，而且今次演唱会，将会继续挑战修哥自己保持嘅「举办演唱会最年长华语艺人」健力士世界纪录。
修哥呢次选择喺日头开骚，原因系因为有次得知有老友记散场后等车等到凌晨一点，令佢好过意唔去，准备以后开骚都喺日头开，令老友记可以睇完返屋企食饭，唔驶搞到好夜。
修哥咁贴心嘅安排，完全系为咗一班老友记嘅生活作息，事关修哥系夜猫一族，佢仲话自己一般都系凌晨十二点左右先瞓，修哥又指自己都想早返少少休息，不过咁多年嚟都系夜猫，实在调较唔到。有时早瞓咗会突然醒，虽然可以瞓返，但都系夜瞓啲好。修哥仲话自己好烂瞓，每日都要瞓九个钟，起身就会做简单运动。
虽然修哥身体都好硬朗，不过佢就话因为已经年纪大，唔可以郁太多，所以演唱会上热舞就未必有，但一定有娱乐性。被问会唔会有加场可能时，修哥幽默表示：「唔好喇啩，九十几岁喇㖞。」不过佢都话好期待加场，但唔知有冇体力。
