近日先于电台颁奖礼中斩获四大奖项嘅 MC张天赋 ，宣布7月将重返红馆举行全新个唱，更以爱因斯坦「质能方程式」E=mc² 为题，寓意著音乐事业进入新里程碑。
「质能等价公式」自1905年提出之后，揭示质量与能量本质上系同一样物件嘅唔同形式，MC将呢份科学深邃，巧妙融入到创作中，将自我蜕变与内外统一，转化为舞台上充满爆发力嘅表演能量。
佢仲透露今次将系「MC」同「Emz」双重人格舞台演绎，呢个概念正好完美呼应爱因斯坦方程式嘅奥义，不论系「MC」定系「Emz」两个身份本质都系张天赋，MC与Emz之间相互转换、往返流转，却始终保持初心。
演唱会海报以一部火红古董车作背景，MC指鲜红车身象征佢喺舞台上发热发亮嘅魅力；而暗调嘅车尾同空间，就隐喻佢内心深处不轻易示人嘅感性同孤独。首次接触古董车嘅MC，拍摄时自觉未能驾驭，不过一知道车辆系自动波后就笑称，「咁比我揸返去玩多两日先还。哈哈。」
拍照时佢更被要求瞓入车尾箱又爬上车头：「全架车比我试晒啦，平日人哋唔试啲位我都试埋。我惊啲衫钮刮花人哋部车，到时真系要『强行买走』带返屋企慢慢玩，哈哈！ 」 上次红馆演出之后，MC指深深明白需要极佳体能去做好一个骚，所以佢早于三个月前已启动密集体能训练计划，积极进行健身同体能锻炼，希望以最好面貌回馈歌迷。佢仲笑言：「最大嘅敌人系肚腩，而家同肚腩系『敌对状态』，希望到7月我哋可以达成和解，由『一嚿腹肌』进化成『一排腹肌』。要乖乖地忍口啰，控制下饮食。」
而舞台呈现方面，MC透露将有非常丰富嘅环节，以及必不可少嘅舞蹈表演：「其实已经开始咗排舞啦，到时入场大家就知。」 鉴于上次门票一开即「秒爆」嘅火爆程度，MC估计今次亦会一票难求，门票11号起供优先订购，佢话：「场数都一定会开多过上一次嘅，具体等官方进一步公布啦。我负责唱歌同表演，其他交俾公司。」
