香港乐坛摇篮「华星唱片」成立55周年，推出「星尘55」大型音乐企划，将经典作品复刻推出黑胶唱片，令乐迷重新认识「华星」重要音乐历史同文化遗产。专访头炮由当年以16岁之龄参加「第七届新秀歌唱大赛」赢得铜奖嘅 郑秀文 揭开序幕。
7月Sammi就会喺启德主场馆举行三场亚洲巡回演唱会终点站，而「华星」亦于呢个时刻推出「Sammi 初」黑胶唱片，当中《不来的季节》同《Chotto等等》都包括其中，经Remastered提升音质。 Sammi指呢次重新推出嘅黑胶唱片非常有意义：「参加『新秀』系我人生好重要嘅一步，好细个嘅时候，大约10岁、11岁左右，我已经决定当够16岁就要去参加新秀，其实我好细个内心已有呢个plan。踏出呢个里程碑，参加呢个比赛入咗行，系我音乐旅程一个非常重要嘅起点。」
年纪轻轻嘅Sammi当时表现淡定：「我而家睇返都觉得自己当时几淡定，屋企人俾我好大嘅支持度，爸爸嘅参与度好高，佢帮我拣歌，俾好大嘅自由度，喺我背后支持我。」赛后Sammi一口答应与「华星」签定8年合约：「当时我计数，8年后都系廿几岁啫！有啲同学为咗未来谂紧点算嘅时候，但我冇压力，考完会考即刻有份工，前面有条路等我去行，而且系我自己去拣。」
今次嘅黑胶碟收录Sammi人生第一首派台歌《思念》、第一次三台冠军《不来的季节》，仲有经典作品《娃娃看天下》。佢话：「《娃娃看天下》当时唔系大Hit作品，但对我嚟讲系一个timeless作品。我以前唱呢首歌真系『娃娃』，依家用大人嘅视觉去睇呢个世界嘅成功、失望、挫折。」入行后工作不断亦极多元化发展嘅佢又话：「有时谂到啲点子或者接到一啲好有趣嘅job，我就会好兴奋。源于呢个Passion，嚟到而家呢个年纪仲可以继续run。」
Sammi又坦言曾幻想退休：「如果天父要我停就停、做就做。我自己内心知道，好多嘢令我会澎湃，尤其是舞台上嘅创作，一谂到啲好玩嘅嘢就会好兴奋。喺演唱会上，我会倾向艺术成份较高，例如《裸体早餐》尝试结合艺术元素放喺演唱会。又例如去年『拉阔音乐』《浮雕》𠮶part艺术成份好高，我觉得啲观众好接受。我好钟意呢啲嘢，好想介绍畀观众，嚟紧倾向艺术性高啲嘅表演方式。」